Fréttir

Skólaslit Varmárskóla 1. - 9. bekkur

Miðvikudaginn 5.júní verða skólaslit Varmárskóla. Þau byrja með "Húllum hæi" út á skólalóð kl. 16:00. Þar verða ýmsar þrautir og útileikir. Níundi bekkingar munu selja grillaðar pylsur og gos fyrir ferðasjóð sinn næsta skólaár en ekki er hægt að taka við kortum.. Við hvetjum alla sem það geta að koma hjólandi eða gangandi þar sem bílastæðin eru fljót að fyllast. Dr. Bæk kemur og og yfirfer hjól þeirra sem það vilja. Einnig verða settar upp skemmtilegar hjólaþrautir, boltaleikir verða í gangi, krítarlist, sápukúlugerð og andlitsmálun.

Hvetjum alla til að koma með góða skapið með sér og draga sólina og góða veðrið með sér.

Nemendur í 10. bekk skólans voru í gær útskrifaðir við hátíðlega athöfn í skólanum. Að vanda var margt um manninn við athöfnina og gestir mættu prúðbúnir til að fagna með útskriftarnemunum. Þórhildur Elfarsdóttir skólastjóri flutti hátíðarræðu ásamt því sem Rósborg Halldórsdóttir, formaður nemendaráðs og Sólveig Franklínsdóttir fulltrúi foreldrafélagsins ávörpuðu samkomuna. Fulltrúar tveggja bekkjadeilda báðu einnig um orðið og heiðruðu umsjónarkennara sína.

Í Varmárskóla eru margir hæfileikaríkir nemendur og nokkrir þeirra fluttu tónlistaratriði fyrir gesti. Gunnar Hinrik Hafsteinsson 10. KÁ spilaði á gítar, Sigríður María Hilmarsdóttir 10. KH spilaði á gítar og söng og Melkorka Þorkelsdóttir 10. HH lék á píanó ásamt því sem Varmárskólakórinn flutti nokkur lög undir stjórn Guðmundar Ómars Óskarssonar.

Að vanda voru nemendur verðlaunaðir fyrir framúrskarandi námsárangur. Hildur Davíðsdóttir 10. KÁ hlaut verðlaun fyrir góðan námsárangur í íslensku. Rósborg Halldórsdóttir 10. KÁ hlaut verðlaun fyrir góðan námsárangur í stærðfræði, líffræði og íþróttum. Arna Karen Jóhanndóttir 10. KÁ og Gabríel Reynir Arnarson 10. HE hlutu verðlaun fyrir góðan námsárangur í ensku. Harpa Helgadóttir 10. HH hlaut verðlaun fyrir góðan námsárangur í íslensku, dönsku og eðlisfræði. Einar Karl Jónsson 10. KÁ hlaut verðlaun fyrir góðan námsárangur í íþróttum og Guðbjörg Ósk Jónsdóttir 10. KÁ fyrir góðan námsárangur í samfélagsfræði. Kristján Jónasson 10. HH hlaut verðlaun fyrir góðan námsárangur í grafík og Melkorka Þorkelsdóttir 10. HH fyrir góðan námsárangur í myndmennt. Jón Hjörtur Pétursson 10. KÁ hlaut verðlaun fyrir góðan námsárangur í hönnun og smíði og Thelma Dögg Grétarsdóttir 10. KÁ fyrir góðan námsárangur í lífsleikni. Jón Hugo Bender 10. HH og Katarina Ananiev 10. HE hlutu verðlaun fyrir góðan námsárangur í sænsku. Ylfa Rós Margrétardóttir 10. HE og Rósborg Halldórsdóttir 10. KÁ hlutu viðurkenningu fyrir félagsstörf og Ylfa Rós fékk einnig framfaraverðlaun.    

Besta námsárangri vorið 2013 náðu þær Hildur Davíðsdóttir og Rósborg Halldórsdóttir í 10. KÁ.

Að verðlaunaafhendingunni lokinni afhenti Þórhildur skólastjóri nemendum brautskráningarskírteini sín og umsjónarkennarar færðu nemendum sínum rósir. Að athöfninni lokinni bauð foreldrafélagið gestum upp á veitingar.

Starfsfólk Varmárskóla óskar 10. bekkingum til hamingju með útskriftina, þakkar þeim samveruna og óskar þeim velfarnaðar í framtíðinni.

Fleiri myndir á myndasíðunni: 10.b - Útskrift

Nemendur í 10. bekk Varmárskóla héldu dagana 29.-31. maí í útskrifarferð ásamt umsjónarkennurum sínum. Ferðinni var heitið í Skagafjörð þar sem gist var í Varmahlíðarskóla. 

Fyrsta daginn var farið í Wipeoutbrautina á Bakkaflöt þar sem krakkarnir fóru í gegnum sérstaka þrautabraut. Fæstir komust þurrir frá þrautabrautinni og því var næst haldið í sund í Varmahlíð. Eftir kvöldmat var síðan haldið í klettaklifur og sig með aðstoð björgunarsveitarinnar á staðnum og í skotfimi hjá Skotfélaginu Ósmanni á Sauðárkróki þar sem nemendur fengu að spreyta sig á æfingabraut félagsins. 

Daginn eftir var haldið í flúðasiglingu niður Jökulsá vestari við mikla ánægju nemenda og stór hópur nemenda og huguðustu kennararnir stukku út í ána fram af kletti. Einnig var farið í litbolta á litboltasvæðinu við Bakkaflöt. Það voru þreyttir en ánægðir nemendur sem héldu heim á leið á föstudaginn eftir frábæra ferð í Skagafjörðinn.

Fleiri myndir á myndasíðunni: 10.b-Útskriftarferð

10. bekkur er búinn að vera í skólaferðalagi. Von er á hópnum upp í skóla í dag um kl. 14:15/14:30

Börnin í 2. bekk fóru í heimsókn í Alþingishúsið miðvikudaginn 29. maí. Þau fengu leiðsögn um húsið og þótti þeim það mjög áhugavert. Börnin borðuðu nestið á Austurvelli og fóru í göngutúr um miðbæinn. Þau skoðuðu fuglana á tjörninni og skoðuðu líkan af Íslandi í Ráðhúsi Reykjavíkur.

Fleiri myndir á myndasíðu: 2b. Alþingi

Bestu kveðjur
2. bekkur

Í morgun veitti frú Vigdís Finnbogadóttir fyrrverandi forseti fjórum stúlkum úr Mosfellsbæ Laxnessfjöðrina sem er viðurkenning sem Samtök móðurmálskennara veita fyrir ritlist. Þær Margrét Dís Stefánsdóttir og Kristjana Björnsdóttir úr Varmárskóla og Andrea Dagbjört Pálsdóttir og Diljá Guðmundsdóttir úr Lágafellsskóla hlutu viðurkenninguna í ár fyrir verk sem þær sömdu í tengslum við ritunarátak innan skólanna.

Myndirnar tók Jóhannes Reykdal en þær eru á myndasíðunni. Einnig birtist frétt um þetta á mbl.is

 Fyrsti bekkur IE hélt bekkjarkvöld að Hraðastöðum í Mosfellsdal. Það var mjög skemmtileg, gott veður og góð mæting. Grillaðar voru pylsur.  Á Hraðastöðum eru kindur, hestar, kanínur, hundar og hænur. Fleiri myndir á myndasíðu

Fimmtudagsmorgun 23. maí komu væntanlegir nemendur í 1. bekk Varmárskóla í heimsókn ásamt foreldrum sínum. Allir mættu fyrst á sal þar sem Þóranna skólastjóri tók á móti þeim og ræddi við börn og foreldra um skólabyrjun. Eftir það var nemendum boðið með kennurum í stofur í spjall og verkefnavinnu meðan foreldrar sátu eftir í sal. Þar kynnti Guðrún Bjarkadóttir skólahjúkrunarfræðingur hlutverk sitt í skólanum og Solveig Ólöf Magnúsdóttir deildarstjóri fór yfir mikilvægi lestrarnáms. Nemendur fengu poka heim með lítilli verkefnabók og ýmsum upplýsingum um nýja skólann sinn.

Myndir á myndasíðu

Eins og kunnugt er stendur Mosfellsbær á tímamótum varðandi gerð nýrra skólabygginga fyrir leik- og grunnskóla. Af því tilefni býður Skólaskrifstofa Mosfellsbæjar íbúum bæjarins og þeim sem nær standa skólasamfélaginu til samráðs um skóla og skólabyggingar í nútíð og framtíð.

Nú er komið að því að nemendur sem verða í 8., 9. og 10. bekk næsta skólaár þurfi að velja. Mikilvægt er að foreldrar/forráðamenn aðstoði nemendur með valið og það sé vel ígrundað.

Valbók og valblöðin má nálgast hér.