Fréttir eftir mánuðum

Miðvikudaginn 31. október klukkan 20 verður fyrsta opna hús vetrarins hjá Skólaskrifstofu Mosfellsbæjar. Í nýjum aðalnámskrám leik- og grunnskóla er horft til 6 lykilþátta og er einn af þeim læsi. Við höfum fengið til liðs við okkur Stefán Jökulsson lektor á Menntavísindasviði Háskóla Íslands til að fjalla um þetta efni og það hvernig það snýr að foreldrum.

Í ár er sjöunda árið sem að Forvarnardagurinn er haldinn að frumkvæði forseta Íslands.  Dagskrá fer fram í 9. bekkjum grunnskóla um land allt þar sem að nemendur eru beðnir um að taka virkan þátt í umræðum um forvarnir gegn fíkniefnum. Varmárskóli tekur þátt í þessari dagskrá líkt og undanfarin ár og mun hún fara fram föstudaginn 2.nóvember að þessu sinni.  Þar munu nemendur vinna í hópum og ræða og skrá eftirfarandi umræðuefni: Hvert ár skiptir máli, íþrótta- og æskulýðsstarf og samvera. Í kjölfarið horfa þau á myndband sem  framleitt hefur verið í tilefni dagsins. Í þessu sambandi er vert að benda á heimasíðuna forvarnardagur.is.

Þann 23. október var haldinn bangsa-og náttfatadagur í tilefni af hinum alþjóðlega bangsadegi sem er laugardaginn 27. október. Börnin komu í náttfötum í skólann með bangsa af ýmsum stærðum og gerðum. Þau unnu ýmis verkefni tengd böngsum.

Sjá fleiri myndir á myndasíðunni - 2b.-Bangsadagur

Líkt og undanfarin 9 ár verður Skólaskrifstofa Mosfellsbæjar með opin hús í vetur fyrir alla þá er koma að uppeldi barna. Hvert kvöld hefst á stuttri fræðslu um efni kvöldsins og lýkur á spurningum og samræðum að því loknu. Opnu húsin eru haldin í Listasal Mosfellsbæjar í Kjarna, síðasta miðvikudagskvöld í mánuði kl. 20:00-21:00 nema annað sé auglýst sérstaklega. Gefnar hafa verið út nýjar aðalnámskrár leik- og grunnskóla og er í þeim gengið út frá 6 lykilþáttum:

Fimmtudaginn 25. okt og föstudaginn 26.okt er vetrarfrí í Varmárskóla og skólinn þá lokaður. Mánudaginn 29.okt er starfsdagur en þá eru nemendur í fríi. Þriðjudaginn 30.okt eru foreldraviðtöl og mæta nemendur ásamt foreldrum sínum samkvæmt tímasetningum sem umsjónarkennarar hafa sent út.

Nemendur í 3.bekk fengu lögregluheimsókn í byrjun október. Heimsóknin var hluti af umferðarfræðslu sem kennarar árgangsins stóðu fyrir. Fréttamaður frá Morgunblaðinu kom og skrifað skemmtilega frétt um fræðsluna. Fréttina má lesa hér. 

Í Varmárskóla, skólaárið 2012-2013 er boðið upp á valáfanga sem er samstarfsverkefni fjögurra landa; Íslands, Svíþjóðar, Lettlands og Liháen. Alls taka 30 nemendur frá Varmárskóla þátt í verkefninu og fer fyrsti hópurinn út í næstu viku. Nánar um verkefnið má sjá undir "Erlent samstarf" en einnig má lesa um það hér.

Dagana 8. og 9. október  fóru 7. bekkingar ásamt 3 kennurum og stuðningsfulltrúa að Úlfljótsvatni. Veðurguðirnir léku við okkur og áttum við skemmtilegar stundir saman. Krakkarnir fóru í ýmisskonar leiki, keppt var í fótbolta á milli bekkja og haldin var kvöldvaka.

Krakkarnir sáu algjörlega um kvöldvökuna sjálf og ekki vantaði skemmitatriðin. Mjög skemmtilegir og frumlegir krakkar þar á ferð.

Við látum fylgja með nokkrar myndir sem að teknar voru í ferðinni, sjá myndasíða - 7.b-Úlfljótsvatn

9. bekkur fór í Þórsmörk 4. – 5. september. Mörkin heilsaði okkur á fimmtudeginum með sól og blíðu og fallegum haustlitum. Krossáin var alveg róleg að þessu sinni. Við gistum í Skagfjörðsskála í Langadal og eftir að við höfðum komið okkur fyrir gengum við upp á Valahnúk. Þar var heldur svalara en stórkostlegt útsýni til allra átta. Þaðan gengum við niður í Húsadal og síðan til baka í skálann með viðkomu í Snorraríki þar sem sumir reyndu sig í klettaklifri. Um kvöldið var stjörnubjartur himinn og gátu þeir fróðu kennt okkur hinum ýmislegt um stjörnumerkin. Klukkan 11 á  föstudagsmorguninn lögðum við af stað heim. Við komum við í Stakkholtsgjá og gengum inn að fossi. Komum svo til baka sæl og glöð klukkan 4 á föstudaginn. Sjá myndir á myndasíðunni.

Útivistarval í unglingadeild Varmárskóla lagði af stað 10 saman hjólandi eftir námsefniskynningu á þriðjudeginum 25. september í fínu veðri. Búið var að koma megninu af farangri fyrir í bíl svo einungis var tekið smá nesti og léttur hlífðarfatnaður í lítinn bakpoka.

Komumst ekki langt þar sem pedali datt af einu hjólinu áður en komið var að Hafravatni. Því var reddað í snarhasti og komið með nýtt hjól og það bilaða tekið heim. Eftir þetta gekk ferðin áfallalaust fyrir sig og var áð rétt ofan við Elliðavatn og borðað nesti og fallegar hraunmyndanir skoðaðar sem nefnast tröllabörn. Þegar komið var upp í Bláfjöll var farið í að koma sér fyrir og næra sig áður en haldið var aftur af stað út, nú fótgangandi. Fengum við leiðsögn og skoðuðum 4 hella, hver öðrum skemmtilegri og var ekki að sjá að nokkrum manni leiddist. Svo var haldið aftur upp í skála og horft á bíómynd áður en farið var að sofa.

Daginn eftir var dimm þoka, rok og rigning og fyrirhuguð hellaferð í einn helli til var felld niður og fengu drengirnir því viðbótar klukkutíma í svefn. Var svo lagt af stað aftur heim í talsverðu roki en að mestu hætt að rigna. Heimferðin gekk áfallalaust fyrir sig og voru það mis þreyttir ferðalangar sem stigu af hjólum sínum í Mosfellsbæ um og upp úr kl 14:00 á miðvikudegi, meira en lítið til í að fara aðra slíka ferð við fyrsta tækifæri. Sjá fleiri myndir á myndasíðunni: Útivistarval-sept.

Nemendur í 2. bekk í hönnun og smíði hafa verið að setja saman rallýbíla og keppa síðan um hverjir drífa lengst, velta fyrir sér afhverju, breyta síðan og bæta rallýbílana í ljósi þess.  Í þessum áfanga ræður hallinn á brautinni miklu um hversu langt og hratt bílarnir fara. Sjá á myndasíðunni: 2b-rallýbílar.

Mánudaginn 1. október héldu 2-ÁH og 2-SBT kartöfluhátíð í Vin. Börnin fóru í námsleiki á meðan Guðrún  heimilisfræðikennari sauð kartöflur og síðan fengu börnin kartöflur með smjöri og salti. Þetta var skemmtileg hátíð. Sjá myndir á myndasíðunni: 2b.-kartöfluhátíð.

Líkt og undanfarin misseri fengum við í Varmárskóla Magnús Stefánsson frá Marita forvarnarfræðslunni til að koma og vera með forvarnarfræðslu fyrir nemendur í 7., 8., 9. og 10. bekk. Nemendur fengu fræðslu á skólatíma, sáu nýja forvarnarmynd og fengu að koma með fyrirspurnir til Magnúsar. Foreldrum og forráðamönnum var síðan boðið á fræðslufund á fimmtudagskvöldið í síðustu viku. Á milli 60 og 70 foreldrar mættu og hefðum við gjarna viljað sjá fleiri.Foreldar sáu sömu mynd og nemendur, fengu síðan fræðslu um hvað beri að varast og hvaða vísbendingar gefi grun um neyslu á vímugjöfum. Í lokin voru umræður og fyrirspurnir, þökkum þeim sem mættu og hvetjum alla til að fræða og ræða við börn sín um skaðsemi vímuefna og mikilvægi heibrigðs lífsstíls.

Föstudagurinn 28. september var fyrsti flotti föstudagurinn í vetur. Að því tilefni héldu nemendur í 10. bekk kökusölu í nestinu. Það voru nemendur í 10. KÁ sem hófu leikinn í ár en kökusalan verður haldin einu sinni í mánuði. Krakkarnir voru búnir að baka glæsilegar kökur og seldust þær allar upp. Kökusalan er fjáröflun fyrir vorferð 10. bekkjar.

Myndir - Kristín Ásta.(sjá á myndasíðu-sept-flottur föstudagur)

Nemendur í 6. bekk í Varmárskóla hafa verið að vinna í skemmtilegu og áhugaverðu verkefni. Þeir unnu í hópum og fengu að velja sér efni eftir áhugasviði.