Fréttir eftir mánuðum

Leiklistarvalið í Varmárskóla sýndi á dögunum frumsamið leikrit. Ákveðið var að allur ágóði af miðasölu myndi renna til góða málefnis. Fyrir valinu var Dropinn sem er styrktarfélags sykursjúkra barna. Á myndum má sjá fulltrúa leiklistarvalsins, þær Kristínu Rán, Svandísi Dóru, Natalíu Erlu og Vigdísi Helgu ásamt Hreindísi Ylfu leikstjóra, afhenda Dropanum 120.000 kr sem krakkarnir söfnuðu. Frábært framtak hjá leiklistarhópnum okkar.

Lestrarpróf voru lögð fyrir þrisvar sinnum yfir skólaárið í vetur í 1.-10. bekk. Gerð var samantekt á niðurstöðum þessara prófa. Þar má sjá hvernig við stöndum okkur út frá viðmiðum Menntamálastofnunar.

Nú hefur Lestrarstefnan okkar hér í Varmárskóla verið endurskoðuð og uppfærð.

Búið er að taka saman niðurstöður samræmdra prófa í 9. og 10. bekk Varmárskóla.

Gagnlistar eru komnir inn fyrir 1.-10. bekk skólaárið 2017-2018. 1. og 2. bekkir verða með ritfangasjóð. Munið að kíkja í töskur og sjá hvað er þegar til og má nýta áfram á næsta ári. Gagnalistarnir eru hér.

Nú er skólaárinu lokið og skólaslit voru í dag hjá 1.-9. bekk. Þeim var skipt í þrennt og voru 4.-6. fyrstir, þá 7.-9. og loks 1.-3. bekkur. Skólakórinn söng, stiginn dans, tónlistaratriði sögur og ljóð flutt. Einnig fóru skólastjórarnir yfir skólaárið og það sem stóð upp úr eftir árið. Vinaliðar fengu viðurkenningar fyrir vel unnin störf á árinu. Við þökkum öllum fyrir frábært ár og sjáumst í ágúst. Nokkrar myndir frá skólaslitum eru hér.

Þriðjudaginn 6. júní voru nemendur úr 10. bekk útskrifaðir við hátíðlega athöfn sem fram fór í eldri deild skólans. Við í Varmárskóla erum ákaflega stolt af þessu frábæra unga fólki sem hefur staðið sig með mikilli prýði og verðið skólanum til sóma. Við þökkum 10. bekkingum fyrir ánægjulegan tíma á liðnum árum og óskum þeim velfarnaðar í framtíðinni.

10. bekkingar fóru í útskriftarferð dagan 30. maí til 1. júní. Gist var á Stokkseyri þaðan var farið í riverrafting, paintball, draugasetur, hellaferð, sunda, adrenalíngarðinn og út að borða víðsvegar um suðurlandi. Ferðin gekk í allastaði glimrandi vel. Nemendur voru sjálfum sér, foreldrum sínum og skólanum algerlega til sóma.

Nemendur skólans hafa nýtt þessa síðustu daga til útiveru, kynnast umhverfinu og njóta samvista. Á myndasíðu skólans má sjá myndir frá þessum ferðum sem og hreyfileikum yngri deildar.

Skólanum verður slitið við hátíðlega athöfn í íþróttahúsinu, miðvikudaginn 7. júní sem hér segir: 4.-6. bekkur klukkan 10:00 7.-9. bekkur klukkan 11:00 1.-3. bekkur klukkan 12:00 Foreldrar eru hvattir til að mæta með börnum sínum. Frístundasel er opið frá kl. 13:00 þennan dag fyrir þau börn sem þar eru skráð. Athugið að útskrift 10. bekkja er þriðjudaginn 6. júní, klukkan 19:30.

Glærur frá hinum stórskemmtilega og afar fróðlega fyrirlestri Páls Ólafssonar um jákvæð samskipti frá súpufundinum þann 16. maí eru hér. Þar geta þeir fjölmörgu sem komu á fyrirlesturinn rifjað efni hans upp og þeir sem náðu ekki að koma geta kynnt sér glærurnar. Bryddað var upp á þeirri nýbreytni að halda aðalfund foreldrafélagsins við þetta tækifæri og stýrði formaður stjórnar foreldrafélagsins, Þórunn M. Óðinsdóttir, fundinum af mikilli röggsemi. Þetta var fjölmennasti aðalfundur foreldrafélags Varmárskóla í manna minnum. Það er gaman að upplifa að stjórn foreldrafélagsins hefur gildi skólans að leiðarljósi í starfi sínu en þau eru virðing, jákvæðni, framsækni og umhyggja. Jákvæðnin í garð skólans, samvinna við stjórnendur og umhyggjan fyrir nemendum og starfsfólki er aðdáunarverð. Við hlökkum til áframhaldandi samvinnu við alla forráðamenn á næstu misserum, þar sem við vinnum í sameiningu að enn jákvæðari samskiptum og enn jákvæðari umræðu um skólann til að tryggja nemendum farsælt skólastarf.