Opið hús hjá Skólaskrifstofu Mosfellsbæjar

Í nýjum aðalnámskrám leik- og grunnskóla er horft til 6 lykilþátta sem eru læsi, sjálfbærni, heilbrigði og velferð, lýðræði og mannréttindi, jafnrétti og sköpun.

Að þessu sinni höfum við fengið Margréti Maríu Sigurðardóttur umboðsmann barna til að fjalla um einn þessara þátta, lýðræði og mannréttindi. Umboðsmaður barna hefur lengi beitt sér fyrir því að áherslan álýðræði og mannréttindi verði aukin í leik- og grunnskólum. Í erindi sínu mun Margrét María fjalla um hvernig Barnasáttmáli Sameinuðuþjóðanna og aðrir mannréttindasamningar hafa litað löggjöf um leik-og grunnskóla og aðalnámskrá þeirra. Þá mun hún ræða um mikilvægi þess að skólar starfi með lýðræðislegum hætti og að nemendur á öllum aldri fái tækifæri til að taka þátt í ákvörðunum sem varða skólann.

Opnu húsin hjá Skólaskrifstofu eru alltaf haldin síðasta miðvikudag í mánuði yfir veturinn, í Listasal Mosfellsbæjar frá klukkan 20 - 21. Athugið að gengið er inn austan megin (Háholtsmegin). Aðgangur er ókeypis og öllum opinn.

Skólaskrifstofa Mosfellsbæjar