Gæðastund með börnunum

Barn sem fær allar sínar grunnþarfir uppfylltar eða nýtur ástar og umhyggju, fær næga næringu og finnur fyrir öryggi myndar að öllum líkindum góð tengsl við foreldra sína eða umönnunaraðila.

Góð tengslamyndun í bernsku er grundvöllur allrar tengsla í framtíðinni og stuðlar að heilbrigðum þroska barnsins.

Til að styðja við góða tengslamyndun er nánd og leikur við barnið mikilvægur hlutur. Daglegur lestur fyrir börn þeim til skemmtunar getur því verið mjög góð leið til að bæta eða styrkja tengslin við þau. Það er gæðastund sem býður upp á alúð og nánd.

Barnið lærir mest af lestrinum ef það fær að taka virkan þátt í honum til dæmis með spurningum og áhorfi á myndir.

Gott er að ræða innihald lestursins og hvetja barnið til að spyrja út í innihald textans. Reynið að örva áhuga og forvitni barnsins. Slík stund býður einnig oft upp á líflegar samræður um hitt og þetta sem barninu liggur á hjarta. Þar er því boðið upp á öruggar aðstæður til að ræða málin í rólegheitum. 

Í annasömum nútímanum er fólk oft með mörg járn í eldinum og athygli þess því oft dreifð. Snjallsímar sjá svo til þess að skilaboðin berast jafn óðum til fólks og dregur athygli þess til sín aftur og aftur. Mikilvægt er að gefa barni sínu reglulega óskipta athygli án þess að vera með augun á símanum. Lesturinn er því gott tækifæri til að leggja snjallsímann frá sér og gefa barninu nokkrar mínútur af beinni og óhindraðri athygli. Slík stund er barninu dýrmæt gjöf.



Jóhanna Dagbjartsdóttir, sálfræðingur

Skólaskrifstofu Mosfellsbæjar