Lestrarátak fyrir alla

Þann 1. janúar hófst fimmta, og jafnframt síðasta, lestrarátak Ævars vísindamanns. Þetta lestrarátak, sem stendur yfir til 1. mars, er aðeins ólíkt hinum fyrri. Nemendur, foreldrar, og allur skólinn eiga möguleika á að vera með í næstu bók Ævars. Að auki verður einn nemandi í hverjum skóla dreginn út og fær bókagjöf frá Ævari.

Það eina sem þarf að gera er að lesa. Allur lestur er gjaldgengur í átakinu og líka bækur sem hlustað er á. Til að taka þátt þarf að skila inn lestrarmiðum sem nemendur fá á skólabókasafninu, og þar geta þeir einnig fengið miða þar fyrir þá foreldra sem vilja taka þátt.

Eins er hægt að nálgast miða til útprentunar á heimasíðu Ævars, auk þess sem þar eru allar upplýsingar um átakið. Öllum miðum má síðan skila á skólabókasafnið.

Lestrarátakið er mjög góð leið til að hvetja börn til lesturs, og að foreldrar geti að auki tekið þátt gefur fjölskyldum skemmtilegt og gefandi verkefni til að vinna saman að.