Ytra mat og umbótavinna

Varmárskóli var á síðasta ári valinn í hóp þeirra 27 skóla sem metnir eru árlega í svokölluðu ytra mati Menntamálastofnunar skólaárið 2019 - 2020.

Í ytra mati felst að matsaðilar Menntamálastofnunar leggja mat á starfsemi skóla með hliðsjón af gildandi viðmiðum sem meðal annars byggja á lögum, reglugerðum og aðalnámskrám. Það er gert með skoðun á fyrirliggjandi gögnum um starfsemi skólans, vettvangsheimsóknum matsaðila og viðtölum við börn/nemendur, starfsfólk skóla og foreldra. Markmið matsins er meðal annars að efla innra mat og gæðastjórnun og vera hvati til skólaþróunar.

Matið var framkvæmt á haustönn og skiluðu matsaðilar skýrsludrögum til skólastjóra til athugasemda í desember. Niðurstöður ytra mats voru kynntar fyrir starfsmönnum skólans þann 15. janúar 2020 og síðdegis sama dag fyrir fræðslunefnd Mosfellsbæjar. Þá kynntu matsaðilar niðurstöðurnar fyrir bekkjarfulltrúum, skólaráði og stjórn foreldrafélagsins 16. janúar. Á sama tíma kynntu skólastjórar tímasettan verkferil við gerð umbótaáætlunar.
 
Leiðarljós umbótavinnunnar verður fyrst og fremst á að efla gæði skólastarfs í Varmárskóla enn frekar og styrkja áfram það sem vel er gert og nýta vel öll tækifæri til úrbóta. Það er óhætt að segja að það sé hugur í skólasamfélaginu í Varmárskóla við að vinna saman að metnaðarfullum umbótum sem munu án efa styrkja enn frekar okkar góða skóla.
Einkunnarorð Varmárskóla eru virðing, jákvæðni, framsækni og umhyggja og í þeim anda höldum við eins áður, ótrauð fram á veginn.

Hægt er að nálgast frekari upplýsingar inn á heimasíðu skólans og á vef Menntamálastofnunar.
http://www.varmarskoli.is/skolastarfid/mat-a-skolastarfi/  
Meðfylgjandi er foreldrabréf þar sem kynntar eru helstu niðurstöður matsins.