Vikufréttir Varmárskóla

Við reynum að hafa sem flest í föstum skorðum þrátt fyrir mikil forföll hjá okkur eins og í öðrum skólum. Við þurftum að breyta uppsetningu á matartímum til að uppfylla viðmið um 50 manns í sóttvarnarhólfi og notuðum það tækifæri og gerðum líka smá breytingar á fyrirkomulagi skömmtunar. Þetta tvennt varð til þess að við náðum að minnka talsvert álagið í matsalnum svo við getum sagt að eitthvað gott hafi nú komið út úr þessu Covid-ástandi.

Óvænt og skemmtileg uppákoma varð í 2.ÁH í vikunni þegar bekkurinn fékk verðlaun fyrir þátttöku sína í jóladagatali Andrésar Andar. Útgáfufélagið bað um að fá að gefa þeim bekkjarsett af Syrpum til að hafa í stofunni, sem við þáðum auðvitað með þökkum.

Með þessari frétt fylgja nokkrar myndir úr skólastarfinu. Til dæmis myndir af verkefnum sem nemendur eru að vinna í textíl og myndmennt. Verkefnin sem sjást þar gætu virst einföld en snúast um margt fleira en bara beinlínis þau verk sem eru í hendi hverju sinni. Þarna er unnið af gríðarlegri einbeitingu að því að samstilla hug og hönd og nota viðeigandi verkfæri.

Þá er mynd af próftöku hjá 6.bekk, sem er að æfa sig í að nota google classroom, sem hefur meðal annars þann kost að um leið og nemendur hafa skilað inn verkefni fá þeir að vita hversu mikið þeir gerðu rétt. Þetta er það umhverfi sem krakkar eru vanir úr tölvuleikjum, það er viðbrögð strax, ekki þarf að bíða eftir að kennarinn fari yfir prófið og flestir kunna mjög vel að meta þetta.

Að lokum er svo mynd af ,,flokkunar-ambassadorum” skólans, en nemendur 6.bekkjar fara um skólann á föstudögum og safna saman öllu flokkunarsorpinu og koma því í réttan gám. Krakkarnir eru mjög ánægðir með þetta verkefni og sinna því af ábyrgð.

Við glímum auðvitað við talsverð forföll eins og aðrir og í dag vantaði til dæmis um 25% bæði nemenda og starfsmanna og það gefur auga leið að ekki er hægt að halda hefðbundinni rútinu við þær aðstæður. Við höfum ákveðið að senda upplýsingar á alla foreldra þegar nemandi innan árgangs greinist smitaður af Covid-19 svo allir séu upplýstir.

Annars erum við bara góð og fáumst við verkefni dagsins með jafnaðargeðið að vopni. 

Hafið það gott um helgina

Kveðja

Starfsfólk Varmárskóla