Vikufréttir Varmárskóla

Vinna okkar með margbreytileika mannlífsins sem átti upphaflega bara að taka viku hefur teygst yfir í þessa viku líka enda af nógu að taka í því efni. Nemendur hafa verið að læra um öll þau fjölmörgu atriði sem áhrif á hvernig manneskjur við verðum. Nú þegar höfum við birt myndir af vinnu 3. og 5. bekkjar og með þessari frétt fylgir mynd af vinnu 2. bekkjar sem notaði bókina ,,Vertu þú” til grundvallar í sinni vinnu. Ef myndin er stækkuð má sjá að á regnbogann eru skrifuð margskonar orð og hugtök sem lýsa fólki og tilfinningum, þessi vinna er því ekki bara fræðsla um margbreytileikann heldur líka orðaforðavinna og þar með íslenskukennsla. Fleiri verkefni eru í vinnslu í skólanum og sum verða ekki tilbúin fyrr en undir vorið.  Öll þessi verkefni hafa stuðlað að auknum skilningi barna á ólíkum aðstæðum og vonandi hafa þau einnig orðið til þess að efla umburðarlyndi almennt.

Færð og veður hafa verið erfið síðustu vikur og mokstur skiljanlega gengið brösuglega suma daga. Við viljum biðja ykkur að nota planið við íþróttamiðstöðina þegar þið akið börnum í skólann eða sækið þau þar sem stæðið sem merkt er starfsmönnum er þröngt og þar skapast auðveldlega hætta þegar bílar eru að bakka á annatíma.

Í næstu viku eru þeir bræður bolludagur, sprengidagur og öskudagur. Sérstök dagskrá er í skólanum á öskudag og kennarar árganga senda heim upplýsingar um það. Við birtum þær líka á facebook síðunni okkar og vonandi geta allir komið í búningi í skólann á öskudaginn.

Hafið það gott um helgina

Kveðja

Starfsfólkið í Varmárskóla