Vikufréttir Varmárskóla

Af okkur er það helst að frétta að í þessari viku hafa allir árgangar verið að vinna með samskipti á einn eða annan hátt. Vinnan við bekkjarsáttmálana krefst þess að nemendur skilgreini hverskonar umhverfi er gott fyrir þá og hjálpar þeim við að byggja upp öryggi og vinnufrið. Krakkarnir vita vel hvernig umhverfi það og geta sagt fyrir um hvernig þeir þurfa að haga sér til að skapa það og viðhalda en gengur kannski ekki alltaf jafn vel að fylgja góðum ætlunum eftir. En okkar verkefni er að hjálpa þeim við þetta þannig að þeir geti aukið þroska sinn og samfélagsvitund.

Í 5. og 6. bekk eru kennarar að prufa sig áfram með áhugasviðsverkefni hjá verkgreinahópi. Sú tilraun lofar góðu. Það er nefnilega svo miklu skemmtilegra að vinna við það sem maður hefur ákveðið sjálfur og flest námsviðmið grunnskólans má uppfylla í gegnum fjölbreytt viðfangsefni. Krakkarnir eru að vinna verkefni um allt milli himins og jarðar, ofurhetjur, ketti og gera líkön af húsum, allt eftir þvi hvað þá langar að gera.

Í 3.bekk eru nemendur að stíga fyrstu skrefin í forritun og þeim finnst það mjög spennandi eins og myndbandið á þessum hlekk hér sýnir. https://youtube.com/shorts/hM41zGHwRwY

Nú þá hélt foreldrafélagið aðalfund í vikunni, þar var kjörin ný stjórn.

Elín Guðný Hlöðvers er formaður og situr í skólaráði og SAMMOS

Birgitta Elín Helgadóttir er varaformaður

Helga Kristófersdóttir er gjaldkeri og í SAMMOS

Dagný Rós Sigurðardóttir er ritari

Íris Rut Þorgeirsdóttir er meðstjórnandi og varamaður í SAMMOS

Sigurjón Norberg Kjaernested, Gunnhildur Edda Guðmundsdóttir, Ingibjörg Alexía Guðjónsdóttir og Nanna Rut eru meðstjórnendur.

Það er frábært að hafa svona öfluga stjórn til að vinna að hagsmunamálum barnanna í Varmárskóla með okkur.

Við minnum svo á að í næstu viku eru bara fjórir skóladagar hjá nemendum þar sem sameiginlegur fræðsludagur Skóla- og frístundasviðs Mosfellsbæjar er föstudaginn 23.sept.

Kveðja

Starfsfólkið í Varmárskóla