Vikufréttir Varmárskóla

Afmælishátíðin var sem sagt haldin með pompi á pragt á fimmtudaginn. Við vorum himinlifandi með þátttökuna en það var eiginlega húsfyllir. Við byrjuðum með smá dagskrá á sal, Skólahljómsveitin spilaði, svo voru þrjár ræður og að lokum söng Varmárkórinn. Að þessu loknu voru veitingar og fólk gat gengið um skólann og séð það sem við höfum verið að vinna að það sem af er hausti. Nú og skólinn fékk líka góðar gjafir frá Foreldrafélaginu og Mosfellsbæ, samstarfsfólki okkar í Kvíslarskóla og kveðjur frá mörgum öðrum. Gjafirnar eru ætlaðar til að efla tæknikennslu við skólann en við eigum sem sagt von á Laser-skera í smíðastofuna og forritanlegum vélmennum í almenna tæknimennt. Við hlökkum til að geta boðið nemendum upp á að vinna með þessi tæki.

Við þökkum öllum gestum kærlega fyrir komuna.

En það var fleira skemmtilegt við þennan dag. Nemendur voru í hátíðarskapi allan daginn og lögðu sig fram um að taka til og skreyta skólann og það var alveg greinilegt að þeir vita ,,hver á þennan skóla"

Myndirnar sem fylgja þessari frétt eru að sjálfsögðu frá afmælishátíðinni og svo munum við setja inn myndir þegar við verðum komin með nýja dótið okkar í notkun.

Nú svo er rétt að minna á að foreldraviðtöl eru í skólanum miðvikudaginn 12.október. Búið er að opna fyrir tímabókanir í mentor.

Næsta stóra verkefni sem við erum með á prjónunum og vinnum í samstarfi við foreldrafélagið er svo að halda samráðsfund foreldra og skóla um mótun stefnu fyrir Varmárskóla. Við teljum mjög mikilvægt að fá foreldra með okkur í það verkefni því stefnan hefur mikið að segja um framtíð barnanna sem ganga í Varmárskóla næstu árin. Við gerum ráð fyrir að halda þingið laugardaginn 15.október frá klukkan 10-13 og vonumst eftir góðri þátttöku.

Bestu kveðjur

Starfsfólkið í Varmárskóla