Vikufréttir Varmárskóla

14.október

Þetta er líklega fyrsta vika skólaársins sem hægt væri að flokka sem það sem margir kalla hefðbundið skólastarf. Það er nefnilega alltaf eitthvað um að vera hjá okkur. Eina frávikið þessa vikuna voru foreldraviðtöl á miðvikudag og við þökkum ykkur öllum kærlega fyrir komuna.

Nú er verulega farið að hausta og því vil ég minna foreldra á að virða útvistartímann sem okkur er settur með lögum. Börn, 12 ára og yngri, mega ekki vera á almannafæri eftir kl.20:00 nema í fylgd með fullorðnum. https://www.barn.is/born-og-unglingar/spurt-og-svarad/utivistartimi-1

Þessar reglur eru ekki settar að ástæðulausu frekar en aðrar reglur sem settar eru í samfélaginu. Börn þurfa að fá sinn svefn og ró og næði áður en þau fara í háttinn. Eftir umfjallanir Kastljóss síðustu daga viljum við ítreka mikilvægi þess að foreldrar fari eftir aldursviðmiðum um samfélagsmiðla, þær reglur eru ekki heldur settar að ástæðulausu. Ef fólk hefur leyft börnum að fá slíka aðganga þarf einnig að fylgjast vel með öllu sem þau gera þar og kenna þeim viðeigandi hegðun, bæði sem viðtekendum og móttakendum.

Á morgun verður svo foreldraþingið okkar þar sem foreldrar og starfsmenn ræða saman um hver eigi að vera meginatriði skólastarfs næstu ára. Það er enn hægt að skrá sig með því senda póst á jona.benediktsdottir@mosmennt.is.

Myndirnar sem fylgja þessari frétt voru teknar í verkgreinahópum hjá 1.bekk í morgun, í myndmennt var verið að gera ,,krotlistaverk” í textíl var verið ýmist verið að sauma út eða vefa, í smíðum var verið að mála og pússa væntanlegan spegil og í heimilisfræði var verið að læra um tannhirðu meðan beðið var eftir brauðum sem voru í ofninum. Þá er einnig mynd frá tónmennt hjá öðrum bekk þar sem nemendur voru að hlusta á Karnival dýranna og reyna að greina einstök hljóðfæri. Það sem er sameiginlegt á öllum þessum myndum er að einbeitingin skín af hverju andliti.

Hafið það gott um helgina