Vikufréttir Varmárskóla

Í þessari viku fengum við líka upplestur frá rithöfundi. Gunnar Helgason kom og las fyrir nemendur í 5. og 6. bekk úr nýju bókinni sinni.

Við héldum áfram að vinna með niðurstöður nemendaþingsins og höfum nú hengt veggspjöld í allar stofur og víðsvegar um skólann með tillögum nemenda að því sem þeir geta gert til að vinna gegn einelti. Í 5. og 6. bekk er svo einnig verið að vinna með svör nemenda við því af hverju krakkar taka þátt í að leggja einhvern í einelti, jafnvel þó að þeir viti að þeir séu að gera rangt.

En á ferð skólastjórans með veggspjöldin í morgun bar ýmislegt skemmtilegt fyrir sjónir sem er gaman að segja frá. Í heimilisfræði var 3.bekkur að útbúa ,,pylsur í felum”. Þar var mikill spenningur og margir sýndu frábæra bakaratakta. Í tónmennt voru nemendur að hlusta á Hnotubrjótinn og æfa rússneskan dans með. Hlekkurinn á myndbandið sem fylgir hér með er einmitt frá þeim. https://youtu.be/HVFLlme8pIc

Svo má ekki gleyma að nefna bingóið sem foreldrafélagið stendur fyrir á sunnudaginn klukkan 12. Í bingóinu verður fjöldi frábærra vinninga en það sem meira er um vert að allur ágóðinn mun renna til að bæta bókakost skólans. 5.bekkur hefur að undanförnu verið að lesa Bókatíðindin og merkja við þær bækur sem þau vilja helst lesa. Við höfum nefnilega trú á því að ef nemendur fá að velja bókakostinn sjálfir verði þeir spenntari fyrir lestrinum. Þetta verður frábær skemmtun fyrir allan aldur og við vonum að fólk fjölmenni og styrki bókasafnið okkar um leið og það tekur þátt í skemmtilegum leik.