Vikufréttir Varmárskóla

Það er búið að vera svo margt í gangi hjá okkur þessa vikuna að það þyrfti líklega þykka bók til að gera því öllu skil. Við vinnum sífellt í að bæta aðbúnað og kennslugögn í skólanum og nú ættu allir nemendur 5. og 6. bekkjar að vera komnir með hlustur um ipadana sem þeir hafa til afnota í skólanum. Þá keyptum við líka kassa með sætisgildiskubbum fyrir alla bekki í 1.-4.bekk og einn auka til útláns á bókasafni. Við erum mörg og svona gögn kosta okkur háar fjárhæðir.  Við ræðum oft við nemendur um hversu hjálplegt það er þegar umgengni þeirra er góð, því þá getum við nýtt fjármagnið sem skólinn hefur til að bæta aðbúnað, sem við viljum auðvitað miklu frekar en þurfa að nota það til að lagfæra hluti sem hafa verið skemmdir.

Á þriðjudaginn voru nemendur 1.bekkjar búnir að vera 100 daga í skólanum og haldið var upp á það með pompi og pragt á miðvikudaginn.

Stóru verkefnin okkar, virðing og kurteisi, fengu mikið pláss í þessari viku enda verður maður aldrei fullnuma í þeim. Allir hópar unnu einhver verkefni tengd þessum gildum í vikunni. Sumir unnu skilgreiningar, aðrir gerðu veggspjöld en vinna allra beindist inn á við og að því hvað maður sjálfur gert til að sýna fólki og umhverfi virðingu í daglegu lífi.

Í dag fengum við svo tónleika frá nemendum Listaskólans. Tveir árgangar voru saman á tónleikum og nemendur spiluðu fyrir jafnaldra sína. Það er heilmikil áskorun að spila fyrir fullum sal af fólki og allir hljóðfæraleikararnir stóðu sig með prýði. Það var líka áskorun fyrir okkar fólk að vera prúðir áhorfendur á 40 mínútna tónleikum og þar stóðu sig líka allir með prýði, enda frábærir krakkar í Varmárskóla. Við erum himinlifandi með samstarf af þessu tagi og þökkum Listaskólanum kærlega fyrir komuna.

Við minnum á foreldrviðtölin á miðvikudag, vonandi eru allir búnir að bóka tíma.

Að lokum látum við svo fylgja með eina mynd úr hversdagslífinu í fjórða bekk.

Hafið það gott um helgina

Starfsfólkið í Varmárskóla