Vikufréttir Varmárskóla

Góða veðrið er nýtt til margskonar verkefna í Varmárskóla. Til dæmis fór 5. bekkur í fuglaskoðun niður að Varmárósum og fann flesta af fuglunum sem þau gerðu líkön af fyrr í vetur.

5.bekkur hefur líka verið að læra um sögu Mosfellsbæjar. Krakkarnir hafa meðal annars farið í heimsóknir á bæjarskrifstofuna og fengið kynningar á stjórnsýslu bæjarfélagsins.

Aðalfundur foreldrafélags Varmárskóla var haldinn í vikunni. Það var fámennt en góðmennt á fundinum og stjórn félagsins var endurkjörin.

Elín Hlöðversdóttir er formaður og með henni eru í stjórn þau Birgitta Elín Helgadóttir, Helga Kristófersdóttir, Dagný Rós Sigurðardóttir, Íris Rut Þorgeirsdóttir, Gunnhildur Edda Guðmundsdóttir, Sigurjón Norberg Kærnested, Ingibjörg Alexía Guðjónsdóttir og Nanna Rut Margrétar Pálsdóttir.

Fólkið sem starfar fyrir foreldrafélagið sinnir óeigingjörnu starfi í þágu allra barna í skólanum og samfélagsins í heild sinni og fyrir það kunnum við þeim bestu þakkir. Svona frábært félag er mikill styrkur fyrir skólastarfið.

Viðbrögð við verkfalli

Foreldrar fengu senda heim viðbragðsáætlun okkar ef til verkfalls STAMOS-félaga kemur á mánudaginn. Við vonum auðvitað að samningar náist en viljum samt vera viðbúin ef það gerist ekki. STAMOS fólkið okkar eru ómissandi hlekkir í þeirri keðju sem skólastarf er og við vonum að þið foreldrar sýnið málstað þeirra skilning. Mikilvægt er að muna að ef til verkfalls kemur verður bara morgunakstur og skóladagur frá 8:10-9:30 hjá 1.-4. bekk og frá 8:10-9:30 og svo frá 12:20-14:10 hjá 5. og 6.bekk. Við biðjum foreldra að fylgjast sérstaklega vel með fréttum af þessu máli.

Svo minnum við líka á að á fimmtudaginn er uppstigningardagur og þá er ekki skóli.

Hafið það gott um helgina

Starfsfólkið í Varmárskóla