Vikufréttir Varmárskóla 1.september 2023

Ferðirnar á fellin í Mosfellsbæ á þriðjudaginn gengu sérstaklega vel. Veðrið lék við okkur og gleðin ein ríkti allan daginn. Þó að þetta séu léttar göngur fyrir marga fullorðna og jafnvel krakka líka, er þetta stór sigur fyrir aðra. Útivist og samvera eru mikilvægir þættir í að efla vellíðan og skapa góðan félagsanda í skólanum auk þess sem nemendur upplifa sigra og gleði við að geta gengið á fjöll. Það að upplifa að maður sé duglegur eykur líkurnar á að maður leggi sig enn betur fram við verkefni sem mæta manni. Nokkrar myndir fylgja með þessari frétt og fara einnig á facebook síðuna okkar.

Við erum svo lánsöm að hafa fengið hana Láru Hrönn til að vera með samsöng fyrir yngri nemendur hjá okkur. Söngstundirnar eru á mánudögum og miðvikudögum og hver hópur fer aðra hverja viku. Hér er hlekkur á smá myndbandsbút frá fyrsta skipti 3.bekkjar í söngstund að þessu sinni. https://youtu.be/qip6qaIrWU8

Í næstu viku verður verkefnið Göngum í skólann sett formlega hér í Mosfellsbæ. verkefnið stendur frá 6.september - 4.október og við hvetjum nemendur sem það geta til að koma gangandi í skólann. Foreldrar leika auðvitað lykilhlutverk í þessu og vonandi hvetja sem flestir krakkana sína til að taka þátt.

Í næstu viku ætla allir árgangar að vinna með gildið ,,virðingu" kennarar útfæra vinnuna hver á sinn hátt með nemendum sínum og vonandi getum við sýnt einhverjar skemmtilegar myndir frá þeirri vinnu í næstu vikufréttum. Markmið okkar með þessari vinnu er að hjálpa nemendum að öðlast djúpan skilning á hversu mikilvægt það er að hugsa um hvernig áhrif maður hefur á samfélags sitt og umhverfi með þeirri framkomu sem maður ákveður að sýna hverju sinni.

Hafið það gott um helgina 

Kveðja

Starfsfólkið í Varmárskóla.