Vikufréttir Varmárskóla 15.september

Í þessari viku hafa bekkir og árgangar verið að vinna sína bekkjarsáttmála. Bekkjarsáttmálavinnan er mjög lýðræðislegt ferli sem byggir á grunngildum. Við byrjum með því að nemendur koma með hugmyndir um reglur sem þeir þekkja og tengjum þær gildum. Það er gert til að útskýra reglurnar og gefa þeim dýpri merkingu. Að því loknu ræða nemendur og kennarar hvaða gildi skapa gott samfélag og út frá því velur bekkurinn nokkur gildi sem hann vill gera að sínum. Gildin eru svo sett fallega upp. Það er þó ekki lokaafurðin sem er meginatriði þessarar vinnu heldur umræðan sem á sér stað í ferlinu. Það er að ræða saman um hvernig reglur þurfa að vera í samfélagi svo fólki geti liðið vel og það tekið framförum. Þegar búið er að velja gildin gefast svo margvísleg tækifæri til að vinna enn frekar með þau, tengt bæði íslensku og lífsleikni.

Eins og við nefndum í síðustu viku erum við að reyna að efla ábyrgðartilfinningu nemenda með allskonar verkefnum. Í vikunni byrjuðu nemendur 6.bekkjar að aðstoða 1.bekk við að komast út í frímínútur, aðstoða í eldhúsinu og safna saman flokkunarsorpinu. Bekkirnir skipta með sér vikum í þessum verkefnum svo hver bekkur fær eina viku í mánuði. Það var frábært að sjá hvað nemendurnir okkar voru áhugasamir og duglegir við þetta. Við værum ekki stoltari af þeim þó að við ættum þá alla sjálf.

Þá er einnig rétt að geta þess að í gær var fyrsti fundir í leshópi kennara um leiðsagnarnám og vonandi munu foreldrar sjá merki um innleiðingu þess í flestum bekkjum og í dag funduðu kennarar í 4.bekk með væntanlegum samstarfs skóla Wales. En við erum að fara í formlegt samstarf með þeim um verkefni um listir og menningu. Í því munu nemendur beggja skóla vinna með sömu viðfangsefni og kynna hver fyrir öðrum.

Svo er eitt enn sem nauðsynlegt er að nefna. Margir nemendur koma hjólandi eða á hlaupahjólum í skólann sem er hið besta mál. En hjólin verða að vera læst á skólatíma. Við erum með allskonar forvitna litla krakka sem hugsa ekki alltaf áður en þeir framkvæma og það getur verið freistandi að skoða spennandi hluti meira en ,,bara með augunum”. Svo minnum við á að hjól og aðrir hlutir sem nemendur koma með í skólann eru ekki tryggð á vegum skólans og því alfarið á ábyrgð eigenda.

Í næstu og þarnæstu viku verða svo haustfundir árganga. Þeir eru nánar auglýstir í póstum frá umsjónarkennurum. Við vonumst eftir góðri mætingu því það er svo mikilvægt að við vinnum saman að mikilvægasta verkefninu, sem er að skapa börnunum jákvætt umhverfi til náms og þroska.

Með þessari frétt fyglja svo einnig nokkrar myndir af nemendum sem skólastjórinn rakst á við vinnu sína í vikunni. Þessar myndir gefa góða mynd af þeim fjölbreyttu viðfangsefnum sem nemendur okkar fást við í hverri viku.

Hafið það gott um helgina

Starfsfólkið í Varmárskóla