Vikufréttir Varmárskóla 9.febrúar 2024

Nú er ,,Vika sex” að verða liðin og við tókum okkar hlutverk alvarlega í henni eins og í öllum verkefnum sem okkur ber að sinna. Nemendur í 4.,5. og 6. bekk fengu sérstaka fræðslu tengda samskiptum kynjanna í félagsfærnitímum þessa viku, um fræðsluna sáu kennarinn í félagsfærninni og námsráðgjafinn okkar. 4. bekkur fór í verkefni tengd sjálfsþekkingu og tók fyrir verkefni eins og hvernig var ég þegar ég var fimm ára og hvernig ætli ég verði þegar ég verð 15 ára. Þar voru líka unnin verkefni með orðaforða tengdum kynfærum, orðasúpur og fleira. Nemendum 5. og 6. bekkjar bauðst að senda nafnlausar spurningar um það sem þeim lá á hjarta tengt þessum málaflokki. Spurningunum var svo svarað og fjallað um þau málefni sem mest var spurt um. Það var áberandi að margar spurningar frá nemendum í 5. og 6. bekk höfðu beina tilvísun í klámefni og ofbeldi tengt tölvuleikjum og flestar spurninganna sem voru af því tagi tengdust undirokun stúlkna.  Við teljum mikilvægt að foreldrar séu meðvitaðir um þetta og fræði börn sín um mörk í samskiptum og ræði við þá um málefni tengd kynfræðslu. Sumir eru óöruggir við það og þá bendum við á þetta efni hér https://a4.is/vtee-bolur-barnastard-l.htmlhttps://a4.is/vtee-bolur-barnastard-xl.html

Í vikunni voru líka foreldraviðtöl og hjá mörgum voru þau með nýju sniði. Nemendur völdu verkefni sem þeir vildu kynna fyrir foreldrum sínum. Flestir kynntu það verkefni semþeir voru stoltastir af og ræddu jafnframt um af hverju það væri, aðrir tóku það sem þeir höfðu lært mest af og útskýrðu það og enn aðrir völdu að sýna verkefni frá byrjun hausts og svo annað sambærilegt sem þeir hafa nýlokið við til að sýna framfarir. Nemendur æfðu þessar kynningar og þannig varð viðtalið líka einn af þeim þáttum sem vinna á með samkvæmt aðalnámskrá.  Þetta skapaði skemmtilegar samræður um nám og kennslu og er hluti af vinnu okkar við að innleiða kennsluhætti Leiðsagnarnáms í skólann. Við erum mjög ánægð með þetta og vonum að foreldrar séu það einnig.

Hjá tveimur nemendahópum varð eldgosið á Reykjanesi að óvæntu viðfangsefni, annars vegar hjá 4.bekk sem nutu útsýnis fyrsta morguninn og nemendur 6. bekkjar reiknuðu rúmmálið í hraunrennslinu og komust að því að það hefði tekið tvær sekúndur að fylla Laugardalslaugina af hrauni með sama hraða og var byrjun gossins. 

Foreldrakönnun Skólapúlsins.  Tilviljanakennt úrtak foreldra ætti nú að hafa fengið sendan hlekk á viðhorfskönnun um skólastarfið. Það er okkur mikils virði að vita afstöðu foreldra til þess sem verið er að gera í skólanum og því vonum við að allir sem fengu hlekk sjái sér fært að svara.