Vikufréttir Varmárskóla 8.mars 2024

Það er alltaf ,,líf á Læk", eins og sagt er.

Strax á mánudaginn fengum við heimsókn frá Listaskóla Mosfellsbæjar. Nemendur okkar, sem jafnframt eru nemendur í Listaskólanum, buðu samnemendum á tónleika. Það var mjög gaman að sjá nemendur blómstra í öðrum verkefnum en við sjáum þá í venjulega. Takk Listaskóli og allir nemendurnir sem spiluðu fyrir okkur.

Á miðvikudag var svo Vinaliðanámskeið fyrir þá nemendur sem eru Vinaliðar á vorönninni. Vinaliðaverkefnið er eitt af því sem við leggjum upp með til að stuðla að betri menningu í skólanum og þá sérstaklega í frímínútum. Það er líka einn þáttur í ábyrgðarverkefnunum okkar sem eru sérstök verkefni sem nemendur fá og eru ætluð til að efla með þeim ábyrgðartilfinningu bæði í skólastarfinu og bara í lífinu sjálfu, því hvað er meira uppbyggjandi en að vita að maður er duglegur og getur hjálpað öðrum.

Nú lestrarátakið okkar er í fullum gangi og vonandi eru allir duglegir við að hlusta á börnin lesa og hvetja þau til að lesa meira en 15 skyldumínúturnar.

Kennarar 5. og 6. bekkjar eru í sérstöku starfsþróunar verkefni sem nefnist Læsi fyrir lífið. Þeir fengu heimsókn frá Háskólanum á Akureyri í vikunni. Heimsóknin er hluti af eftirfylgni háskólans sem leiðbeinir okkur í þessu verkefni sem snýst um að efla lesskilning og áhuga á lestri almennt. Kennararnir okkar fengu fyrstu einkunn fyrir vinnuna sína og það er auðvitað alltaf gaman.

Vegna veikinda þurftum við að færa fræðsluerindið um miðlanotkun sem átti að vera fyrir nemendur 5. og 6. bekkjar, það verður fimmtudaginn 14.mars í staðinn.

Við viljum líka vekja sérstaka athygli ykkar á því að við bjóðum foreldrum líka upp á fræðsluerindi um miðlanotkun barna og miðlalæsi. Miðlanotkun er stór hluti af lífi flestra barna og mikilvægt er að foreldrar leiðbeini þeim þar eins og annars staðar en til þess þurfa þeir að hafa vitneskju um hvað er í gangi í þessum sérstaka og stundum eins og hálfpartinn sjálfstæða ,,heimshluta”. Fræðsluerindið fyrir foreldra verður 13.mars kl. 20:00.