Vikufréttir Varmárskóla 5.apríl 2024

Við erum að æfa okkur í leiðsagnarnámi og eitt af því sem það felur í sér er að læra að setja sér markmið við hæfi. Krakkarnir í 1.bekk eru allir með markmiðin sín á borðinu sínu til að minna sig á svona í dagsins önn. Í dag lásu þeir markmiðin sín upp fyrir skólastjórann. Það var bæði til að rifja markmiðin upp og til að æfa sig að lesa skýrt og fallega fyrir framan gesti.  Þetta var dásamleg stund og nemendur mjög stoltir og meðvitaðir um að markmiðssetning hjálpar manni að gera betur. Það er gott að byrja að æfa sig strax í fyrsta bekk því þá verður manni þessi aðferð töm síðar á lífsleiðinni.

Eins og flestir vita sjálfsagt héldum við nemendaþing um kosti og galla samfélagsmiðla og tölvuleikja með nemendum 6.bekkjar í mars. Niðurstöður þingsins voru svo teknar saman og í dag fengu þátttakendur kort með niðurstöðunum með sér heim. Það er alveg augljóst að krakkarnir okkar gera sér vel grein fyrir bæði kostum og göllum sem fylgja lífinu í netheimum. Við bindum vonir við það að ef maður veit hverjir gallarnir við notkun tölvuleikja og samfélagsmiðla eru, aukist líkurnar á að maður noti þessa miðla á jákvæðan hátt. 

Við minnum foreldra enn og aftur á ábyrgð þeirra í þessu efni og biðjum foreldra í 6.bekk endilega um að spjalla við krakkana sína um kostina og gallana við notkunina. 

Í næstu viku er svo val í verkgreinum hjá okkur. Nemendur 5. og 6. bekkjar hafa þegar valið sér viðfangsefni og fjölmargar greinar eru í boði.

Við vekjum svo líka athygli á því að miðvikudaginn 24.apríl lýkur skóla hjá 3.-6.bekk þegar hádegishlé byrjar. Skóladagur 1. og 2. bekkjar verður eins og venjulega og að skóla loknum verður frístund opin fyrir þá tvo árganga. Þetta er vegna námsferðar starfsfólks til London en þar ætlum við að skoða skóla sem standa framarlega á sviði leiðsagnarnáms.