Vikufréttir Varmárskóla 24.maí 2024

Þessi stutta vika hefur einkennst af æfingum fyrir vorhátíðina. Það verður alltaf sérstakt andrúmsloft í húsinu þegar allir eru undirbúa atriðin sín. Það þarf að gera svo miklu meira en bara æfa leikritin. Það þarf að skrifa handrit, búa til leikmuni, skipta niður hlutverkum og allt þetta verður til þess að andrúmsloftið verður einhvern veginn töfrum hlaðið. Það skapar auðvitað líka álag því það eru til dæmis ekki alltaf allir sammála um niðurröðun í hlutverkin. Það felst líka mikilvægur lærdómur í því að ná samkomulagi eða sætta sig við að hlutir eru ekki eins og maður sjálfur hafði séð þá fyrir sér svo þetta kemur allt út í plús á endanum.

Við erum þó líka að gera ýmislegt annað og í vikunni fór fram rennsliskeppni farartækja í nýsköpunarvali. Því miður voru allir svo uppteknir meðan á keppninni stóð að það gleymist að taka myndir af rennslinu en við bætum það upp með mynd af heimagerðum farartækjum, bæði bíl og skipi.

Verðandi fyrstu bekkingar komu líka í heimsókn í slagviðrinu í dag og fengu að prófa að vera í kennslustund. Við hlökkum mikið til að vinna með þeim á komandi árum.

Það er farið að halla í skólalok þetta árið og næsta vika er síðasta heila vikan hjá okkur. Mánudagur og þriðjudagur verða bara venjulegir, á miðvikudag og fimmtudag er svo vorhátíðin. Sérstakur póstur verður sendur um dagskrá hennar og föstudaginn 31.maí eru hreyfileikar hjá okkur. Þá erum við með dagskrá til 12:00 fyrir alla. 5. og .6 bekkur mega svo fara heim en gæsla verður fyrir nemendur í 1.-4. bekk fram að frístund sem hefst kl.13:20.

Í vikunni þar á eftir er venjuleg dagskrá á mánudegi og svo eru útivistardagar á þriðjudag og miðvikudag. Þá er dagskrá til 12:00 fyrir alla og svo gæsla fram að frístund fyrir 1.-4. bekk. Skólaslit eru svo fimmtudaginn 6.júní. Umsjónarkennarar árganga hafa sent tímasetningu vegna þeirra heim í pósti.

Að lokum minnum við svo á aðalfund Foreldrafélags Varmárskóla sem verður haldinn á sal skólans mánudaginn 27.maí kl.20:00.