6.júní 2024

Þá er komið að síðustu vikufréttunum þetta skólaár. Liðin vika var hlaðin skemmtilegum verkefnum eins og venjulega. Við skipulag skólastarfsins reynum við oftast að setja verkefni sem krefjast mikillar útiveru á þessa síðustu daga í þeirri von að þá sé besta veðrið. Við reyndumst nú ekki heppin með það að þessu sinni en reyndum að láta það trufla okkur eins lítið og hægt var. Krakkarnir okkar hafa upplifað allskonar sem býr til stemmingu og skemmtilegar minningar síðustu daga en það er ekki aðalmálið. Þeir hafa kynnst nærumhverfi  sínu betur, æft sig að vera góður félagsskapur, unnið saman í liðum og tekist á við sitthvað óvænt rétt eins og lífið er hjá okkur flestum í dagsins önn. Það er mikilvægt fyrir krakka aða æfa sig í slíkum verkefnum. Við fórum í sveitaferð, fjöruferð, fjallgöngur, heimsókn í skógrækt, hesthús, golf, ævintýragarðinn og heill árgangur fór saman í sund svo eitthvað sé nefnt. Þessu til viðbótar fór svo 6.bekkur í óvissuferð, þau fóru meðal annars í Skopp og í Nauthólsvík.

Nemendur í 1.-5. bekk kvöddu kennarana sína í gærmorgun og nemendur 6.bekkjar komu ásamt foreldrum síðdegis og kvöddu kennarana sína. Að stuttri kveðjustund lokinni var svo kaffiboð þar sem nemendur, foreldrar og starfsmenn skólans spjölluðu um allt milli himins og jarðar og mest um framtíðina.  Við óskum þeim alls hins besta og hlökkum til að fylgjast með þeim á leið þeirra um lífið.

Nú tekur við sumarleyfi í skólanum. Við verðum nú samt með opið hús í næstu viku svo foreldrar geti komið og skoðað það sem enn er eftir af óskilamunum hjá okkur. Í dag var hringt heim til þeirra sem eiga merkt föt hjá okkur. Við getum ekki geymt föt milli ára svo við biðjum foreldra endilega að koma og skoða og sjá hvort þeir finna eitthvað sem tilheyrir þeirra fjölskyldu. Þann 21.júní munum við fara með allt sem þá verður eftir til hjálparstofnana. Myndir af fötum koma á facebook síðuna af og til næstu daga.

Við sjáumst svo hress í ágúst. Skólasetning verður þann 23.ágúst og við munum senda ykkur pósta þegar nær dregur.

Hafið það gott í sumar

Starfsfólkið í Varmárskóla