Vikufréttir Varmárskóla 11.október 2024

Við erum öll skekin eftir þau hræðilegu ofbeldisverk sem orðið hefur uppvíst um í samfélaginu okkar og sérstaklega þau sem snúa beint að börnum. En börn skapa samfélag sitt ekki nema að litlu leyti sjálf. Það erum við hin fullorðnu sem búum þeim uppvaxtarskilyrði með því sem við setjum á oddinn með gerðum okkar og orðum. Samfélag er flókið samspil allskonar atriða og ekki einfalt að nefna eitthvað sérstakt sem orsakavald að einstökum breytingum. Við hljótum þó öll að vera sammála um að við viljum ekki að börnin okkar líti á ofbeldi sem sjálfsagðan hluti í lífi sínu. Mosfellsbær hefur tekið frumkvæði í því að kalla foreldra saman til fundar um til hvaða ráða er hægt að grípa til að leiðrétta stefnuna. Fyrst með fundi með foreldrum unglinga og svo núna þriðjudaginn 15.október kl.17:00 í Framhaldsskólanum í Mosfellsbæ með fund fyrir foreldra barna í 4.-6.bekk. Við vonumst til að sem flestir foreldrar sjái sér fært að mæta á fundinn og taka þátt í samræðum um hvernig við búum börnunum okkar sem best skilyrði til vaxtar og þroska.

Þessa vikuna hefur verið unnið með þemað vináttu í Varmárskóla. En þemu eins og vinátta og virðing eru viðfangsefni sem koma fyrir aftur og aftur í ólíkum myndum með reglulegu millibili yfir skólaárið hjá okkur. Það er svo margt breytt í lífi barna og þau hafa ekki sömu tækifæri á fjölbreyttum blönduðum félagsskap í frjálsum leik og áður þótti sjálfsagt, þess vegna eru mörg börn sem vita hreinlega ekki hvernig á að vera vinur. Allir vilja hins vegar eiga vini og forsenda þess er auðvitað að geta verið vinur sjálfur. Árgangarnir hafa unnið allskonar ólík verkefni um vináttu í þessari viku. Í 3.bekk ræddu nemendur um hvað er að vera góður vinur og gerðu þessa fallegu skilgreiningu á því hvernig þeir sjá vináttu. Þegar búið er að setja í orð í bekknum hvernig góð vinátta er verður einfaldara að ræða málin ef eitthvað bregður út af, einfaldlega með því að vísa í þetta samtal. Svona samtöl þarf að eiga oft í viku við börn sem eru að vaxa upp, því tilfinningin fyrir vináttu kemur ekki af sjálfu sér, skilning á henni þarf að byggja upp smátt og smátt eins og á öllu öðru.

Við minnum svo á foreldraviðtölin á miðvikudaginn og vonumst til að sjá sem flesta.

Hafið það gott um helgina

Kveðja

Starfsfólkið í Varmárskóla