Vikufréttir Varmárskóla 1. nóvember 2024

Stuð alla daga hjá okkur

Eins og þið hafið vonandi heyrt af erum við að innleiða leiðsagnarnám í skólastarfið. Á skólastjórarölti í vikunni gekk ég inn á hóp sem var einmitt að vinna í margföldun og nýtti sér eitt af verkfærum leiðsagnarnámsins og það var alveg magnað að sjá vinnugleðina. Nemendur áttu að vinna einstaklingslega við að finna út úr einföldu stærðfræðidæmi (4x6) og lyfta svo spjaldi með svarinu þegar allir voru búnir. Það sem vakti sérstaka athygli var að við þessa vinnu sá ég nemendur beita fjórum ólíkum aðferðum, hver og einn beitti þeirri aðferð sem honum fannst best og allir upplifðu árangur.

Nú svo var 5. bekkur að vinna með samanburð á lífverum og var að skoða lengd á steypireyði, eins og sjá má þarf mjög marga fimmtu bekkinga og heilan gang í skólanum til að ná sömu lengd og  fullvaxinni steypireyði.

Og meira af 5.bekk. Sá dásamlegi sjálfsprottni viðburður átti sér stað að nokkrir nemendur úr árganginum auglýstu leiksýningu í hádeginu þann 31.október, á hrekkjavökunni. Bæði leikendur og áhorfendur skemmtu sér konunglega.

Við fengum líka tvær heimsóknir í vikunni frá verkefninu ,,Skáld í skólum”. Sævar Helgi Bragason og Linda Ólafsdóttir komu með dagskrána ,,Út í geim og aftur heim” fyrir 5. og 6. bekk og þær Helen Cova og Karitas Hrundar Pálsdóttir komu með dagskrá sem nefnist ,,Sprelllifandi tunga” fyrir 1. og 2. bekk.

Hafið það gott um helgina

Starfsfólkið í Varmárskóla