Vikufréttir Varmárskóla 8.nóvember 2024

Í dag er baráttudagur gegn einelti og við Í Varmárskóla héldum okkar árlega nemendaþing um varnir gegn einelti, eins og við höfum gert undanfarin ár. Að þessu sinni voru það nemendur úr Kvíslarskóla sem komu og aðstoðuðu okkur með því að taka að sér hlutverk borðstjóra. Þeir stóðu sig mjög vel og við þökkum þeim kærlega fyrir hjálpina. Þátttakendur í þinginu voru nemendur úr 5. og 6. bekk, rétt rúmlega 160 talsins.  Hóparnir fengust við fyrirfram ákveðnar spurningar og það var frábært að heyra hvað samræður krakkanna voru einlægar en líka markvissar. Í lokin kynntu svo hóparnir niðurstöður sínar fyrir samnemendum. Allt gekk þetta eins og í sögu og allir voru til fyrirmyndar. Við vorum hrikalega stolt af krökkunum og helst myndum við vilja sýna ykkur allar 100 myndirnar sem við tókum, en látum duga að setja sýnishorn hér með og á facebook síðu skólans. Við munum svo taka niðurstöður allra hópanna saman og sjá hvað við getum unnið með þær. En ekki nóg með þetta, heldur höfðu allir nemendur í þessum árgöngum raðað skónum sínum eftir hádegisfrímímínútur svo gleði okkar var sannarlega mikil í dag.

En þó að aðeins 5. og 6. bekkur hafi verið á sérstöku málþingi í dag erum alla daga að vinna með vináttu og leiðir sem börn geta notað til að æfa sig í að vera góður vinur. Ein myndin sem fylgir hér með sýnir hvernig krakkar í öðrum bekk æfa sig í að efla vináttu um leið og þeir æfa bæði lestur og skrift.

Hafið það gott um helgina

Starfsfólkið í Varmárskóla