Fréttir

Í næstu viku 15. - 19. febrúar mun fara fram lestrarátak í skólanum. Markmiðið er að allir nemendur lesi hljóðlestur í kjörbók 20 mínútur á dag. Nemendur geta fengið bækur að láni á bókasafni skólans en við hvetjum ykkur foreldra/forráðamenn til að finna áhugaverðar bækur með börnum ykkar og ræða við þau um innihaldið. Það skiptir máli að þau finni bækur sem þau ráða við og hafa áhuga á að lesa. Tíminn sem veittur er í lesturinn er mikilvæg yfirlýsing skólans um að lestur skipti miklu máli. Við lítum svo á að yndislestur auki við orðaforða, skilning, þekkingu og námsárangur nemenda. Lestur bókmennta er mikilvægur liður í almennri lestrarþjálfun og lestur stuðlar að betra valdi á máli, sem er mikilvægt í mannlegum samskiptum. Því hefur einnig verið haldið fram að bókmenntalestur sé mikilvægur liður í mótun sjálfsmyndar barna og unglinga. Í bókmenntum leita ungir lesendur að fyrirmyndum og máta sig inn í aðstæður sögupersónanna. Hvetjum foreldra til að kíkja á bókasafnið eða í bókaskápinn heima.

Allskyns kynjaverur fylltu ganga og stofur skólans í dag. Mikið líf og fjör var í báðum húsum eins og venjan er á þessum degi. Í yngri deild var slegið upp balli þar sem nemendur í eldri deild stýrðu þeim yngri í dansi. Þá fóru nemendur í íþróttahúsið þar sem kötturinn var sleginn úr tunnunni og í verðlaun voru spil fyrir bekkinn. Söngkeppni 6. bekkjar var einnig haldin og bara Sigríður Ragnarsdóttir úr 6. US sigur úr býtum. Í 2. sæti var Aþena Rún Kolbeins úr 6. EH og í því 3. var Ásdís Rán Kolbeinsdóttir í KMH. Í eldri deild var farið í kónga og svo voru leikir og atriði á sal.

Hér hefur safnast upp mikið magn af óskilamunum síðan skóla hófst í haust. Endilega kíkið á þá í báðum deildum og athugið hvort börn ykkar eigi eitthvað af þessum verðmætum. Þá er líka mjög mikið í íþróttahúsinu.

Fyrsta Opna hús ársins hjá Skólaskrifstofu Mosfellsbæjar verður haldið miðvikudaginn 27. janúar klukkan 20 í Listasal Mosfellsbæjar. Eins fram hefur komið, er á opnum húsum lögð áhersla á hagnýt ráð varðandi uppeldi og samskipti við börn og unglinga. Ráð sem foreldrar, systkin, ömmur og afar, þjálfarar, kennarar og allir þeir sem koma að uppvexti barna og unglinga geta nýtt sér. Að þessu sinni mun Wilhelm Norfjörð sálfræðingur fjalla um metnað foreldra í þágu barna sinna. Á barnið mitt að komast í landsliðið? Á barnið mitt að fá 9,5+ í öllum greinum? Á barnið mitt að geta það sem ég gat ekki? Eigum við að daga úr metnaði barnsins okkar ef okkur finnst hann fara út fyrir okkar mörk? Hvar eru mörkin ?Sannleikurinn er sá að þessu er erfitt að svara en hér verða nefndir margir áhrifavaldar sem hafa áhrif á kröfur okkar. Foreldrar geta verið öruggari með þann gullna meðalveg sem þeir hafa valið barni sínu í kröfum og metnaði ef þeir skoða málið út frá mörgum sjónarhornum. Wilhelm Norðfjörð hefur áratuga reynslu af því að sinna fræðslu fyrir foreldra og aðra uppalendur auk þess sem hann hefur haldið mörg námskeið um samskipti foreldra og barna.Áhugavert innlegg sem á sannarlega erindi til þeirra er koma að uppeldi barna með einum eða öðrum hætti. Opnu húsin hjá Skólaskrifstofu eru alltaf haldin síðasta miðvikudag í mánuði yfir veturinn, í Listasal Mosfellsbæjar frá klukkan 20:00 - 21:00. Athugið að gengið er inn austan megin (Háholtsmegin). Aðgangur er ókeypis og öllum opinn

Rétt er á nýju ári að rifja upp með börnum helstu umferðarreglur sem þau þurfa að þekkja og nýta sér til að tryggja öryggi sitt í umferðinni. Kennum börnum öruggustu leiðina milli heimilis og skóla öruggustu leiðina milli heimilis og vina öruggustu leiðina milli heimilis og tómstundaiðkunar að öruggasta leiðin er sú leið þar sem farið er yfir fæstar götur að nota endurskinsmerki að fara yfir gangbraut að nota gangbrautarljós að fara yfir vegi þar sem hvorki er gangbraut né gangstétt að nota öryggisbúnað í bíl reglur í kringum skólabíl og strætó að nota öryggisbúnað á reiðhjóli, hlaupahjóli og línuskautum að leika á öruggum leiksvæðum

Jólaskemmtanir eldri og yngri deildar voru að venju síðasta skóladag fyrir jólafrí. Nemendur mættu í stofu til umsjónarkennara í sínu fínasta pússi, margir skiptust á gjöfum, hlustuðu á jólatónlist, fóru í leiki eða spiluðu áður en haldið var fram á sal þar sem dansað var í kringum jólatréð. Í eldri deild voru skemmtiatriði þar sem nokkrir nemendur stigu á stokk, sungu, dönsuðu og spiluðu á hljóðfæri. Að lokum var haldið diskótek. Yngri deildin fékk jólasveina í heimsókn, kórinn söng og nemendur í 5. bekk sáu um helgileik. Eins og sjá má á myndunum var afar skemmtilegt.

Þann 10. desember var haldin hátíð hér í Varmárskóla í tilefni af 60 ára afmæli Nóbelsverðlauna Halldórs Laxness. Kristín Helga Gunnarsdóttir rithöfundur og formaður Rithöfundasambands Íslands færði börnum landsins dagskrána -Þegar lífið knýr dyra- um börn á þröskuldi fullorðinsára í verkum Halldórs Laxness að gjöf fyrir hönd Gljúfrasteins og Radda- samtaka um vandaðan upplestur og framsögn. Baldur Sigurðsson dósent flutti erindi um texta Halldórs sem valdir voru í heftið -Þegar lífið knýr dyra. Nemendur Varmárskóla sungu og fluttu texta Halldórs. Þeir stóðu sig allir mjög vel og voru skólanum til sóma.

Rithöfundar hafa verið duglegir að heimsækja skóla landsins og lesa upp úr bókum sínum og fékk yngri deildin heimsóknir frá þremur rithöfundum nú fyrir jól. Þetta voru þeir Gunnar Helgason sem las upp úr bók sinni Mamma klikk, Guðni Líndal sem las úr bókinni Leyndardómur erfingjans og Ævar Þór vísindamaður sem gefur út bókina Þín eigin goðsaga. Myndir eru á myndasíðu.

Það er gaman að fara í útistofuna Vin á aðventunni. Krakkarnir í 6. JV og 6. EHS fóru í góðu veðri í síðustu viku, sungu jólalög og þáðu kakó og piparkökur hjá Margréti útikennara. Þetta var mjög skemmtilegt. Sjá myndir á myndasíðu.

Föstudaginn 18. desember eru stofujól og jólaskemmtun í yngri deild. Skóli hefst hjá öllum kl. 08.10 en lýkur fyrr en vanalega eða kl. 12.10. Jólaskemmtanir hefjast kl. 8.15. Boðið er upp á gæslu í skólanum til kl. 13.00. Frístundasel er síðan frá 13.00-17.00. Ávextir eru ekki þennan dag og hvetjum við nemendur til að taka með sér hollt nesti EN það má taka með sér „óhollt nesti“ eins og smákökur og gosdrykki (helst litlar dósir). Hádegismatur verður fyrir nemendur sem skráðir eru í mötuneyti. Rútur fara kl. 12.25 fyrir þá sem fara ekki í gæslu og kl. 13.10 fyrir þá sem fara ekki í Frístundasel. Frístundarrútan fer svo að venju kl. 16.00. Skóli hefst að nýju þriðjudaginn 5. janúar samkvæmt stundaskrá.