Fréttir

Vegna veðurs má búast við að starf grunnskóla á höfuðborgarsvæðinu muni raskast í dag þriðjudag. Skólar eru opnir en foreldrar eru beðnir að fylgja yngri börnum í skóla og yfirgefa þau ekki fyrr en þau eru í öruggum höndum starfsfólks. Gera má ráð fyrir töfum á umferð, það getur því tekið lengri tíma að komast í skólann. Nánari upplýsingar eru á shs.is og á Facebook-síðu Slökkviliðs höfuðborgarsvæðisins og lögreglunnar á höfuðborgarsvæðinu.

Lýst hefur verið yfir óvissuástandi á höfuðborgarsvæðinu. Íbúum höfuðborgarsvæðisins er ráðlagt að vera ekki á ferðinni eftir klukkan 17.00 í dag. Foreldrar eru vinsamlegast beðnir að sækja börn sín tímalega á leikskóla Mosfellsbæjar þ.e. ekki síðar en klukkan 16.00 til að starfsfólk skólanna komist örugglega heim. Sama gildir um frístundasel allra skólanna. Íþróttamiðstöðvum Lágafelli og Varmá verður lokað klukkan 16.00 og öllum íþróttaæfingum því aflýst í dag. Hljómsveitaræfing Skólahljómsveitar Mosfellsbæjar fellur niður í dag. Kennslu í Listaskóla Mosfellsbæjar eftir klukkan 16.00 og tónleikum sem halda átti í Hlégarði seinnipartinn í dag er frestað. Upplýsingar um opnun skóla og íþróttamiðstöðva á morgun þriðjudag verða sendar út í kvöld. Íbúar eru hvattir til að hreinsa frá niðurföllum þar sem því verður við komið. Hafa skal samband við 112 ef neyðarástand skapast.

3. bekkur fékk góða og gagnlega heimsókn á dögunum í tilefni af eldvarnarviku. Slökkviliðið mætti og fór í gegnum helstu brunahættur á heimilium og hvað best er að gera til að koma í veg fyrir bruna. Að því loknu var farið út og þar fengu nemendur að vita allt um sjúkra-og slökkvibíla. Nemendur fengu svo getraun með sér heim þar sem þau svara spurningum um brunavarnir og einnig vasaljós til að lýsa upp skammdegið. Myndir frá heimsókn eru á myndasíðu.

Miðvikudaginn 25. nóvember er annað opna hús vetrarins og ætlar Valdimar Þór Svavarsson ráðgjafi frá Lausninni að fjalla um meðvirkni barna. Eru börn meðvirk? Hvernig þróast meðvirkni í uppvextinum og á hvaða hátt birtist hún þegar við verðum eldri?

Menntamálaráðherra, Illugi Gunnarsson kom í heimsókn í Varmárskóla á degi íslenskrar tungu. Með honum í för voru starfsmenn ráðuneytis, bæjarstjóri Mosfellsbæjar, Haraldur Sverrisson og fleiri. Heimsóknin hófst með tónlist frá meðlimum í Skólahljómsveit Mosfellsbæjar í anddyri yngri deildar og síðan var haldið í hátíðarsal skólans. Þar tók við fiðluleikur og valin atriði úr báðum deildum frá því um morguninn. Skólakórinn leiddi söng milli atriða. Nemendur stóðu sig einstaklega vel og vönduðu sig. Að lokum lá í skoðunarferð í eldri deild þar sem kíkt var í kennslustundir. Þess má að lokum geta að á hátíðardagskrá dagsins á Bókasafni Mosfellsbæjar voru m.a. Anna Thelma Stefánsdóttir sem er nemandi í 10. bekk Varmárskóla og Þóra Björg Ingimundardóttir sem er fyrrverandi nemandi við skólann. Þær sungu báðar listavel.

16. nóvember er dagur íslenskrar tungu og fæðingardagur Jónasar Hallgrímssonar. Af því tilefni vorum við með skemmtun á sal í báðum húsum. Þar voru nemendur með fjölbreytt atriði s.s. ljóðalestur, söng og leik.

Föstudaginn 6. nóvember var bangsa- og náttfatadagur hjá 4. bekk í tilefni af hinum alþjóðlega bangsadegi sem var 27. október. Bangsarnir sem komu í heimsókn voru af ýmsum gerðum, stórir og smáir.

Í morgunsárið tóku nemendur og starfsfólk Varmárskóla sig til og dönsuðu saman gegn einelti. Tilefnið var að í gær þann 8. nóvember var baráttudagur gegn einelti. Zumbakennarinn Guðný Jóna Þórsdóttir leiddi dansinn með frábærum töktum og voru afar fáir sem gátu staðið kyrrir undir því. Þessi uppákoma heppnaðist frábærlega, frétt um þetta rataði inn á mbl og væntanlega verður einnig frétt um á RÚV í kvöld.

Síðastliðinn föstudag mættu ýmsar kynjaverur í skólann en þá var hræðilegur föstudagur (halloween).

Miðvikudaginn 4. nóvember eru foreldraviðtöl. Foreldrar eiga að vera búnir að bóka viðtalstíma hjá umsjónarkennara barnsins síns. Börnin mæta í viðtalið nema annað hafi verið ákveðið. Ekki er hefðbundinn skóladagur. Frístundasel opnar kl. 13:30 fyrir þau börn sem eiga vistun þann dag og skólabíll fer kl. 16.00. Umsjónarkennarar eru til viðtals í heimastofum nemenda og sérkennarar og sérgreinakennarar í sínum stofum. Íþróttakennarar verða til viðtals á bókasafninu í yngri deild. Munið eftir að kíkja eftir óskilamunum en þeir eru í fatahengjum og í kjallara skólans.