Fréttir

Á hverju ári hafa nemendur í 6.bekk Varmárskóla tekið þátt í vísindaverkefninu ,, Eggjastuð“. Verkefnið felur í sér að pakka tveimur hráum hænueggjum inn í sömu pakkningu þannig að hægt sé að henda þeim fram af svölum án þess að þau brotni. Þetta er hópavinna og aðferðin við að pakka eggjunum er algjörlega frjáls.

Miðvikudaginn 10. júní voru skólaslit í Varmárskóla og að því tilefni var svokölluð karnivalstemning á skólalóðinni. Eins og sjá má á myndunum var ýmislegt skemmtilegt í boði og höfðu flestir gaman af.

Þriðjudaginn 9. júní voru nemendur 10. bekkjar útskrifaðir við hátíðlega athöfn á sal skólans. Að venju var stundin afar hátíðleg og salurinn þétt setinn. Nokkrir nemendur stigu á stokk og fluttu tónlistaratriði auk þess sem Skólakór Varmárskóla söng nokkur lög. Þórhildur Elfarsdóttir skólastjóri flutti hátíðarræðu auk þess sem Sólveig Franklínsdóttir formaður foreldrafélagsins sagði nokkur orð.

Síðasta skóladaginn í vor spiluðu nemendur í 8. bekk saman félagsvist en kennarar þeirra ákváðu að kenna þeim spilið auk þess sem tveir bekkjanna höfðu þegar fengið kennslu á foreldrakvöldi. Spilið gekk vonum framar og krakkarnir skemmtu sér vel. Stefnan er svo að halda áfram spilamennskunni þegar tækifæri gefst næsta skólaár.

Mánudaginn 8. júní og þriðjudaginn 9. júní eru útivistardagar hjá nemendum Varmárskóla. óhefðbundið skólastarf tekur við þessa daga og nemendur eru meira og minna í vettvangsferðum. Skóladagur nemenda lýkur kl. 13:00 þessa daga. Skólaslit 10.bekkja fara fram í sal eldri deildar þriðjudaginn 9.júní kl. 19:30. Skólaslit 1. - 9.bekkja fara fram miðvikudaginn 10. júní.

Nemendur í 5. bekk hafa verið að læra um víkinga í vetur. Af því tilefni var farið í heimsókn í Víkingaheima í Reykjanesbæ. Þjóðháttafræðingur tók á móti hópnum og fræddi nemendur um lifnaðarhætti víkinga og siglingar þeirra. Einnig var farið í Rokksafnið þar sem hægt var að prófa karókí og ýmis hljóðfæri. Að því búnu hélt hópurinn í Skessuhellinn, heilsaði upp á skessuna og fékk sér nesti á túninu í blíðskaparveðri.

Í dag stóðu nemendur 10. bekkinga fyrir kynningu í skólanum á lokaverkefnum sem þau hafa unnið að undanfarnar vikur. Gríðarlega mikil fjölbreytni var á verkefnum nemenda. Nemendur fóru í starfskynningar til fyrirtækja og snerust verkefnin þeirra um það helsta sem þau fræddust um. Myndir má sjá hér á myndasíðunni.

Nemendur í 4. bekk Krikaskóla og Varmárskóla hafa hist nokkrum sinnum í vetur til þess að kynnast hvert öðru, þar sem þau verða öll saman í Varmárskóla á næsta skólaári. Þau hittust nú á vordögum, 28. maí. Þau settu niður kartöflur og birkitré, bökuðu snúbrauð yfir eldi í Vin og fóru í leiki.

Nemendur í 4. ÁH eru að vinna með námsefnið Ísland áður fyrr og fóru þess vegna á Árbæjarsafnið miðvikudaginn 13. maí. Þau fengu leiðsögn um safnið, sem var bæði fræðandi og skemmtileg. Myndir hér.

Lokahatíðir Litlu upplestrarkeppninnar voru fyrir stuttu. Undanfarnar vikur hafa nemendur verið að æfa sig og tekið miklum framförum í lestri og upplestri. Þeir buðu svo foreldrum og gestum að koma á hátíðina og hlusta á hvernig til tókst. Allir stóðu sig með mikilli prýði og fengu að lokum viðurkenningu fyrir þátttökuna. Myndir má sjá hér